星期五天氣轉差，氣溫急降，走上陸羽，只得餐飲M一位坐響度，其他老友各有藉口唔嚟，相信係賴天氣之故。餐飲M話左丁山前星期日（3月26日）掛住去跑馬，唔出席餐廳R郊外午餐之會，走晒寶，因為嗰間餐廳食物好，環境靚，有田園風景可欣賞，在內吃星期日午餐，氣氛好到極。問餐廳叫做乜名呀？講出嚟，左丁山係大鄉里，全無印象。呢間One Thirty- One位於西沙路吐露港旁邊，近馬鞍山，唔便宜嘅，如此遠離市區嘅餐廳，午餐要收六百元一位，比中環蘇豪區貴得多，但生意相當好，可見得香港人一知道有好嘢，就照去可也。
然則成個餐飲行業境況如何呀？餐飲M即刻唉聲嘆氣，原來佢最近有幾單壞賬，每單幾千元，唔算大，但加起嚟就肉痛，有啲打電話去追數，冇人接聽電話，佢親自摸上門，哎，間地中海餐廳已經由新租客租咗，正在開始裝修，改為日本餐廳，又有一間直情由清盤人發信嚟，叫佢填報貨款放賬，以便追討，餐飲M問清盤人：「一百蚊可唔可以收番二十蚊？收唔到我就費事嘥精神時間填報嘞。」清盤人講：「呢樣冇得包嘅，請你照樣填報，等我地有個完整紀錄啦。」餐飲M話新年過後有不少食肆執笠，PMQ嘅高價西班牙餐廳已經關門大吉，成個PMQ保育活化計劃相信會得個蝕字。
餐飲M嘆息生意難做，中小企供應商更加難捱之時，一位醫生走過嚟俾左丁山睇佢手機內之一幅書法，據講係名人今年三月初親筆寫嘅，內地朋友用微信傳過嚟，呢幅書法係寫魯迅名詩：「慣於長夜過春時，挈婦將雛鬢有絲。夢裏依稀慈母淚，城頭變幻大王旗。忍看朋輩成新鬼，怒向刀叢覓小詩。吟罷低眉無寫處，月光如水照緇衣。」翻查資料，呢首詩係魯迅喺1931年因朋友在上海被國民黨拘捕處死之後而寫嘅，顯得心裏有火，而又無可奈何，一股悲憤，不知何處發洩。左丁山問醫生：「啲書法似係上一代老人家手筆，寫呢幅字，可能佢都係心中有火，但自覺無力回天噃。」醫生一笑，再將幅字放大，就睇到出自誰人之手，有個署名係「江澤民」！醫生問左丁山如何詮釋，連忙耍手擰頭，邊度有資格去考證呀，人人有一套解讀各自不同，「忍看朋輩成新鬼」，嗒落有味，二十年前，江先生點會寫呢首詩吖！