全國政協委員林大輝噚日正式接任香港體育學院主席，任期兩年。大輝大師心情靚爆，話體院主席工作任重道遠，有信心應付未來嘅挑戰，因為自己係福將，「希望有得冧莊啦」。大師話首要工作係會晤各體育總會，下星期會上京拜訪國家體育總局同中國足協，希望體院日後多啲同內地交流，亦會多啲向青少年推廣運動。
身為林鄭競選辦主席團成員嘅佢不忘奶媽，話做體院主席有天時地利人和，天時就係林鄭重視體育，如果冇政府支持，體育發展會寸步難行，𠵱家見到香港未來充滿希望，「佢（林鄭）外形雖然唔係運動型，但唔代表佢冇心，相信佢啲體育政綱會一一落實」，仲讚奶媽政綱關照埋退休運動員。
地利則係2018年亞運同2020年奧運都喺亞洲舉行；人和就係體院有優秀團隊。佢話體育可以凝聚社會和諧，政府應投放更多資源，並重申奶媽到目前都冇搵過佢組班，自己唔啱擔任官職喎。