公民黨郭榮鏗同民主思路召集人湯家驊喺特首選舉中鬧不和，一個撐曾俊華，一個被指係林鄭啦啦隊，佢哋噚日喺一個座談會上碰頭，火花四濺。郭榮鏗唔客氣直指曾俊華用咗兩個月就團結到社會，但湯家驊嘅「第三條路」搞咗兩年卻完全失敗，仲話由立法會選舉至選委會選舉，民主思路參選人都係全輸，連法律界咁中產、咁溫和都唔撐湯家驊。
湯狀俾郭榮鏗數落時全程保持笑容，佢話多謝郭榮鏗關心，自己即使失敗都會繼續爭取民主喎，暗寸曾俊華選完就走。
湯狀又話，郭榮鏗以《版權（修訂）條例》為例證明政府唔肯接受泛民提出嘅中間方案，批評政府無意修改行政與立法關係嘅講法唔公道，佢話版權條例首次推出時，政府願意接受泛民嘅中間方案㗎，點知最後關頭因為網民不滿泛民支持中間方案，泛民最終同政府反枱、唔認數，先搞到政府唔敢再信泛民喎。