以為車路士喺英超榜首領放，捧盃冇懸念？車仔周六英超雖然有法比加斯開紀錄，但3分鐘內俾水晶宮嘅韋費特沙夏同賓迪基各入一粒，爆冷主場輸1:2，嗰邊廂熱刺作客就憑艾歷迪亞同孫興民入波，作客贏般尼2:0，一來一回雙方只係差7分咋，聯賽冠軍仲有排爭！之前講過10場波要攞21分先夠捧盃嘅車仔領隊干地，賽後對住記者仲笑得出，話「呢個對你哋嚟講係好結果，令爭標形勢更有趣」。不過，講到周中要主場火併曼城，干地就變番認真mode：「我成日都話，聯賽要到你數字上肯定捧盃先叫完結。我哋周三要對曼城，大家都知道對手嘅實力，但目前最重要係恢復同休息。」
至於熱刺領隊普捷天奴眼見球隊聯賽4連勝氣勢正盛，當然唔會放過車仔，豪言要後上爭標咁話：「呢場係重大嘅勝利，就算車仔失分，我哋都要做足本份，並為英超錦標而戰。」不過，佢哋都唔係冇隱憂，因為雲耶馬同哈利雲克斯呢場先後受傷，連埋射手哈利卡尼未好番，兵源都有啲緊絀。