莊貝思走咗後，上年12月正式上任嘅渣打集團（2888）主席韋浩思（José Vinals），聯同一班獨立非執董及行政總裁溫拓思（Bill Winters）等人，上周二、三首次嚟香港開董事會，除咗同客戶見面，亦有同本地員工及管理層見面，唔知有無捽數呢？
渣打話，José出任主席以來，首次喺英國以外地區召開董事會，係凸顯渣打重視香港市場，亦都會繼續投資本地市場。與此同時José都想了解多啲區內發展潛力，尤其係中國喎，至於係乜議題，當然唔少得近年好似口頭襌咁講出嚟嘅「一帶一路」同「人民幣國際化」。
聽講，José有讚香港作為集團最大嘅盈利來源地，員工表現得好好，不過唔知今年會加幾多人工呢？