嗰頭先至講外檔馬贏晒今午（2日）前三場，呢頭第四場四班1400米又見到外檔馬包辦前三名。當中9檔馬「魅力知寶」在騎師韋達胯下後上爆冷開齋，單Win及組合獨贏A3分別派107及44元，8檔「喜悅明駒」及12檔「常拼常勝」分別跑二、三名。
「魅力知寶」隸屬文家良馬房，現年四歲，出自舊年香港國際馬匹拍賣會，身價450萬元，比今日第二場頭馬價值320萬之「紅駿之星」貴了130萬。「魅力知寶」馬主鄧偉彬正是「魅力知友」馬主鄧詠琪父親，今季鄧詠琪養馬運甚佳，「魅力知友」三連勝，「情意相投」亦一捷，鄧詠琪合共四Win，估唔到老竇鄧偉彬今日亦不執輸贏「魅力知寶」。
「魅力知寶」當初出道頭兩仗，均由韋達策騎，後期轉至田泰安胯下，六戰過後最叻第三未贏過。今次重配韋達負輕磅出戰四班1400米，閘前被落飛黨睹到變十倍半冷，人馬合作沿途居中前位置，末段一條氣殺上，及時追過對手，贏頸位爆冷開齋。
「喜悅明駒」最終追過「常拼常勝」跑第二，前置之「常拼常勝」跌落第三名，第四名為大熱門「正本雄心」，四重彩派一萬八千幾。