一位外籍朋友在上星期一晚上揸車經過軍器廠街，見到警署門口企滿人，唔知發生乜嘢事，返到跑馬地住所，立即來電郵詢問，左丁山都係睇電視知道新聞嘅啫，轉告之：「警察拉人，有關2014年佔中一事，三位發起人及其他涉案份子，會被檢控。」朋友覺得奇怪：「咁多人參加佔中，點拉得晒呀，現在又stir things up（撩起舊事），係唔係要撕裂呀？」
都唔知點答，後來朋友第二日睇完南華早報，來電郵講：「The whole thing is incredulous」（件事好難相信，俗啲翻譯就係搵鬼信。）朋友代表嘅外來勢力，西方帝國主義思維就係一個字，incredulous，完全唔信係律政司獨立檢控佔中三子，沒有政治考慮，亦唔信湯家驊所講之：「時間誠屬不幸」，呢句係西方語言，中文就係有咁啱得咁蹺啫，唔好彩碰着選特首之後啫嘛！湯家驊依家對政府幾仁慈嘅，可惜問勻全港，大概都冇人相信袁國強司長以及刑事檢控專員楊家雄決定檢控法律學院同學戴耀廷及其他人，係事前冇問過梁振英及安排時間表嘅。林鄭月娥已自政府辭職競選特首，佢唔知公佈檢控時間，大家還可接受。
無論我地信唔信律政司新聞稿，眼前事實就係梁振英政府離任前為林鄭月娥政府埋下政治地雷，呢類官司有排打，一兩年之內審完又審去到終審庭，會消耗不少律政司嘅精力，最得益者只係親政府嘅資深大律師，公帑律師費任收唔嬲；林鄭以低民望當選，上任後急需鞏固民意，團結社會，但對佔中行動進行大規模秋後算帳嘅話，啲黃絲帶點會服氣，必會在不同層次與林鄭政府對着幹。梁振英如為林鄭着想，就應該將檢控之事交由林鄭政府決定，而唔係佢希望拉攏各界之際，突然製造檢控佔中三子事件，令林鄭及下任律政司冇彎轉。特首競選中後期，好多中環人都覺得奇怪，為什麼唐英年陣營與CY 2.0咁鬼好傾，左丁山以為係受中央強迫，梁文道首先在蘋果提出建制派和解論，中央做和事老，一致對付曾俊華。後來練乙錚在蘋果分析係唐營反撲成功，令中央DQ CY，報五年前一箭之仇。投票前夕，紐約時報一位華裔記者報導無論林鄭與曾俊華邊位贏，最大勝利者都係唐營及其幕後支持者，有練乙錚假說（hypothesis）之影子！係唔係唐營真的win-win呢？睇林鄭組班入閣人物就知端倪，假如全部梁粉出局，大家會知係乜嘢一回事。假若如此，就難怪梁特先下手為強，埋下地雷先咯。