事隔10年，阿里巴巴創辦人馬雲再登《財富》雜誌封面，仲接受咗雜誌訪問。佢提到2016年為咗向全球推廣阿里，周圍飛去見唔同嘅國家元首同商界領袖，留喺飛機嘅時間超過800個鐘，仲晒命話有人同佢講，專業飛行員都飛唔到咁長時間。
周圍飛做marketing
對上一次馬生上封面已經係10年前嘅事，當時阿里啱啱係香港上市，《財富》封面標題用到「馬雲如何創立中國最熱門的互聯網公司」（當然冇預計到之後股價表現欠佳同埋私有化）。10年後，阿里雖轉到美國上市，但外國人似乎仍然唔係太了解阿里。報道提到，「對於大多數外國人來說，馬雲的公司仍然是一個謎」，所以中國首富馬雲仲要周圍飛去做好marketing。
美國《財富》雜誌早前公佈2017年全球最傑出領袖名單，馬雲選為全球第二傑出領袖，比教宗方濟各亞馬遜公司創辦人貝佐斯排得更前。
除咗上《財富》封面，「金句王」馬雲噚日係深圳嘅IT領袖峯會又有金句，話大陸絕大部份做得唔好嘅實體經濟都鬧互聯網，馬生話人哋「賴地硬」，又指「互聯網不是替罪羊」，大家應該諗吓點樣利用互聯網做得更好。呢句會唔會係馬生放喺內心好耐嘅真心話？
李華華
mailto:[email protected]