【劉鑾雄講大劉】
【連載系列之五 講煮講食】
富豪劉鑾雄（大劉）日前接受《蘋果》獨家專訪，今回講飲食，大劉一家曾是福臨門常客，曾有報道指他每年消費約400萬元，每日平均吃萬元。自患糖尿後，大劉口味轉清淡，透露菜式少六成鹹度、少七成糖份，更轉場到半島嘉麟樓、中環唐人館外，更將福臨門廚師「私有化」，聘請做家廚。
跟工人學煮餸
不過大劉有另外一個說法，他表示：「未搵到嘢做，請佢哋返嚟，唔想佢哋廚藝失傳。」大劉批評現在福臨門質素下降：「以前都有80、90分，𠵱家唔啱胃口。」大劉更會鞭策：「佢哋個個都有個通病，百分之一千都唔試食物，都係識煮唔識試，同埋佢哋都唔識食，佢哋習慣令到佢哋永遠去唔到最perfect境界。」
提到對飲食講究，大劉更自封專家中的專家，他說：「中菜、西菜我都識煮，你出去讀書，唔係𠵱家環境咁好，唔通你日日出去食西餐、酒樓同九大簋，都係自己煮，初初跟廚房工人睇吓學吓，到11、12歲已經好識煮餸。初初可能搵啲凍飯，搵啲雞蛋打落去，搵啲豉油、魚露炒炒吓越炒越熟。」
「唔係淨食貴嘢」
大劉年輕時愛下廚，但忙於為事業打拼，近四十年只落過兩、三次廚，問他有甚麼撚手小菜？他就謙虛表示：「唔方便講，以前其中追女仔就係煮餸，真係好叻，同好好食，同埋有興趣，煮餸其實最緊要用心，做生意都係用心。」
把大廚請回家後，大劉現時愛在家開餐，家常便飯會有十幾個餸：「如果請客就有2、30個餸，好似鹹牛脷、牛仔骨、中式牛柳，我鍾意食唔同嘢，唔係淨係食貴嘢，反而魚翅、鮑魚、遼參我就普普通通，請客用，我自己麻麻哋。」大劉亦喜愛食各式中西甜品，其中有Zoe西餅，而對方亦為他調配減糖口味，不過現因糖尿已戒食兩個月，但會買一些送給深水埗區小朋友及長者。
採訪：陳月媚
攝影：陳俊強
【Timeline】手機用戶請按此，瀏覽「傳奇狙擊手劉鑾雄 」: http://bit.ly/LAU-timeline
【話你知】同大劉有關係嘅名人、美女有幾多? 即睇「大劉人物關係圖 」: http://bit.ly/JosephLau