沙田馬場今日（2日）第九場二班1400米，姚本輝馬房嘅「旌暉」上場以2.9倍大熱門身份跑同程港澳盃，可惜入直路後冇空位上前，受困情況頗明顯，其後更嚴重失去平衡及失地，只跑第7名，是此駒首次喺1400米路程三甲不入，非常冇運。
「旌暉」今場再戰，因為騎開嘅史卓豐停賽，所以換上炒飯哥羅理雅操刀，呢匹馬同時已報名角逐4月9日1600米國際二級賽主席錦標，如果今場跑得好，相信屆時好大機會參賽，但炒飯哥喺主席錦標已卜定騎沈集成馬房「縱橫大地」，故此「旌暉」屆時暫定會由刑滿復出的史卓豐騎番。
換言之，101分頂班馬「旌暉」和炒飯哥今場可能係「一次性合作」，一定盡砌無保留。羅理雅埋門曾經操過「旌暉」兩課，佢大讚隻馬精神爽利，狀態好FIT，今次降班角逐二班賽對手較弱，排5檔亦佳，既然黃金機會出現，佢一定唔理「旌暉」下場主席錦標仲有冇貨賣，最緊要自己今場贏咗先，必定鬥志百分百！