香港一手樓市近月旺到飛起，地產發展商有幾多可以賣就賣，使出加價加推策略，賺到眉開眼笑，有前線記者回報，南昌站上蓋住宅樓花，出幾多賣幾多，有不少人手持支票在售樓處買唔到樓唔肯走。
樓市係唔係癲癲地？中原城市領先指數已突破150，比1997高峯超出46%咯喎！不過資深老編陸振球就話，20年升46%，唔算多啫，做其他生意20年，先至賺取46%，邊個肯制呀！咁又係，如果買中一啲增長股票如騰訊、瑞聲、美國蘋果、亞馬遜、谷歌等等，都唔知升咗幾多倍啦，原來過往20年買樓雖則保本有突，賺住兼賺銀，其實投資回報率並非標青。
施永青轉軚，由唱淡變唱好，一向眼光神準嘅李嘉誠話未來兩年樓價難跌，又係唱好。3月27日信報有位房地產評論員／新加坡南洋理工大學經濟系副教授葉秀亮發表文章，繼續唱淡，呢位葉教授講，香港樓市泡沫在爆破邊緣，一旦開始，香港樓價會累積下跌六成至七成半。講到咁得人驚，有乜解救呀？原來做教授嘅都識得賣膏藥，或者想林鄭月娥三顧草廬搵佢做顧問，佢話：「筆者過往文章也詳細解釋了，對於今次巨型樓市泡沫形成，曾蔭權、曾俊華和陳德霖負有無可推卸的責任，致使稍後樓市泡沫爆破已是難以避免的現實。下任特首宜主動與此切割，最好是找多些財經人士及經濟學者，指出上述人等的責任，並組織足夠水平的經濟團隊專程應付未來經濟災難：由於香港缺乏能構思出可應付此經濟災難的專家，惟有先找幾個在經濟政策上比較『打得』的經濟學者，和能聽明及有力執行筆者日後政策建議的官員（如任志剛），筆者將繼續在《信報》發表有效和頗具開創性的政策建議，從旁協助。」
口氣咁大，欺香港無人乎？新加坡地產不景，政府已下調減辣，希望穩定樓市，唔知有冇請呢位葉教授做軍師呢？啱啱嗰日碰到地產專家王震宇，問佢點睇呢位教授之言，佢話：「我對樓市現時興旺興奮狀態，有啲保留。但學府中人多數離地，對現實市場無感覺，佢地講樓市冇乜大參考價值。」即係話佢都睇淡，但不認為新任特首林鄭月娥有能力解決房地產問題，佢在政綱提出嘅「綠置居」，實在此舉只會令香港房產市場架構更加混亂，無補於幫助無殼蝸牛上車。
唉回歸20年，發覺原來最佳上車時機係2003年，但嗰陣時市場一片死寂呢，下一次會係幾時？信上述嗰位葉秀亮教授，就繼續等下去，等樓市價跌起碼五成先至講，但恐怕到時又係冇人敢買樓！