禮拜六4月1日愚人節，放鬆吓啦香港人！不過，有一種仇恨點都唔可以攞嚟開玩笑，除咗國仇家恨，就係要鄙視嗰啲球壇「If You Can't Beat Them, Join Them」嘅二五仔！其中今季表表者，就係以7,500萬歐元身價由拿玻里轉投祖雲達斯嘅阿根廷前鋒希古恩。
其實一位29歲前鋒賣到7,500萬歐元本來除笨有精，而且拿玻里亦針對性收購咗波蘭前鋒米利克，仲打起埋另一射手梅頓斯，但絲毫不減拿不勒斯球迷對希古恩嘅恨。無他嘅，祖雲達斯身處嘅都靈被視為富裕北部嘅代表，拿玻里嘅基地拿不勒斯就猶如混亂無序嘅南部隱喻，加上祖記近屆喺意甲獨大，今季更有望聯賽6連霸，難得拿玻里上季成為最咬近一隊，呢位上季聯賽轟入36球嘅意甲神射手竟然跳船，原本有資格成為球會傳奇，最終應驗咗《蝙蝠俠：黑夜之神》嗰句「You either die a hero, or you live long enough to see yourself become the villain」！
希古恩喺聯賽首循環交鋒好威水，主場射入一粒幫祖記贏2:1，但嚟緊一周先後喺禮拜日意甲同禮拜三意盃4強次回合作客舊會，拿不勒斯小販就率先將着上「斑馬軍團」波衫嘅希古恩肖像印上廁紙度賣，擺明係I Don't Give a Sxxt嘅態度，連街頭啲垃圾桶都着埋希古恩舊波衫……又睇吓拿玻里球迷到時會點招呼佢？