香港國際七人欖球賽周五開波喇！香港男女隊噚日就喺香港體育學院進行公開操練，男隊仲同里奧冠軍斐濟打咗場友賽㖭。
港男隊今年七欖同智利、斯里蘭卡同納米比亞一組，噚日進行賽前唯一一課公開畀傳媒採訪嘅操練，仲搵咗由前教練備加力執教嘅斐濟拍跳。雖然兩隊實力有啲距離，但港男隊都成功達陣，表現唔錯。華將李卡度（Cado）收操後就話：「我哋一月去過斐濟對佢哋，今次同上次比，我哋防守好咗好多。」港男隊新帥莊保羅就同Cado一樣，以外圍賽冠軍為目標：「球隊對斐濟嘅友賽表現唔錯，但要減少失誤。」港男隊周二會再友賽威爾斯。女子組方面，今年四強起就會去到大球場比賽，港女隊上年打入四強，副隊長高香慧今次就將目標放喺決賽：「四強就可以入大球場，對我哋嚟講有鼓舞作用，但今年目標係入決賽！」
七欖過後，香港就會有另一體育盛事場地單車世界錦標賽上演。備戰緊嘅「女車神」李慧詩，噚日喺體院撞到斐濟隊一眾大隻男都忍唔住「集郵」，仲教佢哋講廣東話；而慧詩勁敵「德國女警」禾高噚日就已經飛嚟香港。