話說前日八方手痕發現，立法會交通事務委員會主席陳恒鑌，喺畀政府嘅質詢入面，要求政府將唔存在嘅「干諾道東」車速資料交俾佢。雖然香港就冇呢條路，不過運輸署署長楊何蓓茵，特登喺表格入面加個附註，寫住「本港沒有名為干諾道東的街道」提醒佢。
八方非常好奇陳恒鑌主席點解咁堅持要搵條「干諾道東」出嚟，於是就翻查多幾年嘅立法會資料，發現原來陳恒鑌主席並唔係第一個，喺立法會問「干諾道東」車速資料嘅議員。真正嘅「干諾道東」之父，其實係陳恒鑌嘅民建聯黨友，民建聯元老陳鑑林。
睇返資料，陳鑑林最早喺2013年嘅預算案開支質詢，已經開始問運輸署拎「干諾道東」車速資料，當時佢老人家同樣係做緊立法會交通事務委員會主席，運輸署當年嘅回覆，已經特別用附註提醒佢，「本港沒有名為干諾道東的街道」。或者民建聯唔滿意個答案啦，陳鑑林自己喺2015年問多次，舊年開始就由陳恒鑌接力，用格式幾乎一樣嘅問題，要求運輸署畀「干諾道東」車速資料佢哋。
干諾道中東面，明明就係告士打道。兩任交通事務委員會主席，前前後後問足4次，都要堅持問落去，唔通呢條神秘嘅「干諾道東」係佢地嘅秘密通道？