今年回歸廿周年，係人都知我哋個特區政府最疏爽，呢啲大日子點會唔派吓禮物益大家。噚日旅遊事務署同旅發局一班大佬去咗機場宣傳，宣佈聯同21個旅遊partner（咦！七三廿一，唔通順便慶祝奶媽登基？）由今日起推出「慶祝香港特別行政區成立20周年禮遇精選」，有超過40項優惠咁大把！
柯P話小島冇嘢睇
話晒要應節，所以景點門票、交通、觀光、餐飲及shopping等優惠好多都同20有關，例如消費優惠可減20%（八折！畀夠兩折開心啲喎！）、指定月份出生旅客可以特價用20蚊買飛。旅發局印咗成80萬本優惠小冊子喺轄下各旅客諮詢中心、多間酒店及旅行社等派發。
可能大家覺得，又係呢啲優惠冇厘新意！台北市長柯文哲都話：「香港很無聊，一個小島有甚麼好看的」呀，不過蘇錦樑好淡定咁話，香港地一年都有五、六千萬旅客嚟玩，呢個數字殊不簡單，話反映旅客覺得香港好有吸引力。睇數字最實際，今年頭兩個月累計訪港旅客又回升，有1.4%升幅咁多呀！唔怪得蘇局長對旅遊業咁有信心！不過佢到𠵱家都唔肯講自己7月會留任定離開，唔知又對自己嘅前同錢途又有冇信心呢？
李八方