3月24日晚上，旺角山東街的中僑商業大廈22樓一個band房發生火警，一名女鼓手被困房內，慶幸於鄰房練歌的歌手安俊豪(《亞洲星光大道星級舞鬥》冠軍得主)發現，奮不顧身將女子救走。事後不少網民大讚他勇敢，不過安俊豪稱「只係人之常情，邊個都會咁做」。
「大約8點20分，我哋喺band房set緊嘢，一插支咪就停電，開頭以為燒fuse，點知道聽到隔籬有人話着火」安俊豪憶述當晚經過。隔壁的鼓房當時已燒到火光熊熊，由電掣位燒到窗簾，「我見到房中有個女仔呆咗，郁都唔郁，我就拉她走」。幸好安俊豪反應快，他與女生走出房間十至二十秒後，就發生第一次爆炸，「我覺得成件事真係靠嗰20秒，執番條命！」
不過經歷了那麼驚險一幕，安俊豪沒有立即離開之餘，反而逐層拍門叫人走，「我叫咗兩個朋友走先，就去樓下十九至廿一樓嘅人走，因為我驚有人唔知道。我記得去到20樓一間CD舖，仲有人揀緊CD，職員仲玩緊電話，我就話上面火燭快啲走！」直至他到19樓看到消防員才離開，「喺上面我完全唔驚，但落到地面我先諗番頭先好危險，先識驚，我未試過離死亡咁近！」
多得他心口有個勇字，女鼓手才安然無恙，原來安俊豪都是膽粗粗走他的音樂路。安俊豪，原名李志豪， 09年參加《亞洲星光大道》出道，亦是《亞洲星光大道星級舞鬥》的冠軍得主。完了亞視三年藝員約之後，他再膽粗粗去台灣參加超級偶像比賽，但最後都被淘汰被迫回港，直到2016年才簽約成為歌手，正式出道。安俊豪表示：「之前冇咩收入，都要keep住做part time，o依家我做緊一個18區嘅busking(街頭表演)，希望自己嘅音樂除咗透過大氣電波之外，都有多個渠道比大家認識我嘅音樂。」
香港做音樂似乎很難成功，尤其經濟因素最易令人放棄，「我試過銀行得番29個幾，嗰段時間最難受，因為要去決定放唔放棄想做嘅事，然後去做一份為搵錢嘅工。」幸好安俊豪沒有放棄，堅持了整整8年，「19歲我同自己講，玩到22歲唔得就做其他嘢；去到22歲，又發現可以去台灣試試；到23、24歲，諗住放棄但又有機會試音，最終簽咗唱片公司，又重燃我希望。」當被問到最終目標，他坦言：「我心態就係有幾耐做幾耐，因為我由小到大都冇咩自信，唯一覺得自己OK就係音樂，其實我冇特別想有咩成就，我只係想用音樂俾大家知道我安俊豪係咩人。」
採訪：UOG、盧妹
攝錄：馮峰、廖達燊
攝影：沈健程
服裝贊助：Bauhaus