早排特首選舉期間，立法會前主席曾鈺成成日俾人估佢支持奶媽定薯片，搞到佢公開講乜寫乜都俾人估係咪另有所指，搞到佢都好唔得閒。𠵱家特首選舉完咗，曾鈺成終於可以唔使再糾纏撐邊個、唔撐邊個，不過佢噚日出席港台電台節目，同班小學生對談時，又被問到點先算好嘅行政長官，小學生又問佢以後會唔會再參選行政長官。
曾鈺成就冇直接答點先算好嘅行政長官，叫人睇睇由過去到現在嘅3名行政長官，再睇埋下一屆嘅行政長官，自然就知道！佢又話自己今年已經70歲，5年後嘅參選機會應該不大，不過曾鈺成好順得人意，有小學生叫佢唱歌，佢都順應要求唱番兩句，唱咗《海闊天空》入面一段歌詞。