前廉政專員湯顯明幾年前被踢爆專誠買茅台孝敬一班內地官員，仲叫下屬分拆單去claim番錢，俾人質疑佢違例。最後廉署話投訴唔成立，湯顯明亦都成功甩身。不過，八方最關注係湯顯明嗰啲酒最後飲晒未呢？咁啱民主黨嘅林卓廷早排就問廉署，湯顯明任職時所買嘅烈酒，係咪已經飲晒？而廉署噚日書面回覆時候話，湯顯明當時所買嘅烈酒已經全部丟晒，𠵱家廉署自己有40支餐酒，係留番有宴會時候用嘅。廉署仲有溫馨提示，話喺2013年6月起，已經全面禁止員工喺公務場合飲烈酒，所以茅台再冇用武之地啦！
另外，廉署舊年一共收到847單涉及政府部門嘅貪污投訴，當中警務處榮登榜首，有241單投訴，最後有148單可以追查。而舊年亦有15個公務員或者牽涉政府部門貪污案嘅人被定罪，其中警務處同消防處各有一人被定罪。