曼聯周六就會喺英超主場迎戰西布朗，但佢哋今場有伊巴謙莫域、安達靴里拉停賽，保羅普巴、基斯史摩寧同菲爾鍾斯因傷缺陣，搞到領隊摩連奴頭都大埋。唔緊要，仲有「朗隊」喺度！朗尼今季喺聯賽上陣18場入得兩球，表現的確失色唔少，周四佢就喺社交網站上載一張10歲效力Liverpool Schoolboys時候嘅相，問吓各位球迷認唔認得邊位係童年朗尼？其實一睇個招牌笑容就知，朗尼係後排左二嗰個啦！朗尼當時喺Liverpool Schoolboys造出過單季射入72球嘅球會紀錄，直至2010年先被打破，唔知佢係咪想藉住呢張相，重拾入球觸覺呢？