【KOL個L】當網上越嚟越多人被稱或自稱KOL，現實中以KOL為主題嘅本地平台亦日漸增加，有啲公司更加提供工作坊，仲標榜費用全免。究竟KOL可唔可以透過培訓班孕育出嚟？
有公司早排推出免費KOL培訓活動，活動現場所見，不論後生仔女、在職人士，甚至連媽咪級都齊齊嚟上堂，有乜嘢咁吸引？參加者之一，Cherry係一位新手媽媽，最近開咗臉書專頁記錄同家人嘅生活點滴，兼分享育兒知識心得，「反正係免費嘅，嚟上吓堂，睇吓會唔會有乜機會。」唔通世上真係有免費午餐咁筍？Adfocate創辦人Willy話：「聽落好似好着數，但係你想攞到啲嘢，就要付出一啲嘢。我希望做到一個良性社群。你有咩好，可以分享，創作人之間互相交流。」咁你哋食乜嘢㗎？「當然平台都要賺錢，本身好多客戶好欣賞我哋，會sponsor(贊助）線下工作坊。」即係聚集唔同範疇嘅KOL，同時提供平台，幫客戶搞工作坊，參加嘅朋友就可以分享出去。師父，明白了！
Willy唔太鍾意用「KOL」呢個詞，「我希望用Content Creator，即係內容創作者。如何做到Storytelling（說故事）好緊要 ，但係唔係個個都識。我就用比較layman（顯淺）嘅方式教佢哋。」Willy覺得新一代比較難叫佢哋自發去睇書，深化同優化自己嘅技巧，所以搞課程就實在啲、「雞精」啲、即食啲！佢希望參加者上完堂，增進知識，創作更好嘅內容。佢喺工作坊提到，「我哋同出版社或者其他公司有深入合作，如果我覺得你好OK，我會轉介你，但我唔會自己同你哋簽約。」花精力去訓練，但係只係做轉介？咁點解唔簽約合作呢？Willy覺得，「一簽咗約就係親生仔，好多隨之而嚟嘅問題會衍生，我一定會有偏見。」呢個方法，同大台演員訓練班反其道而行喎。唔簽約，唔要親生仔，咪會變晒孤兒仔？另一位年輕參加者Porsche喺工作坊完結後表示：「如果對於啱啱起步想搞page，有好多內涵但唔知點講出嚟嘅人，我覺得好有幫助，因為始終搞page唔同寫日記。」但對於佢自己嚟講就似乎一半半，「我比較唔係sell個人，我個page係評論電影，啲人會睇我點樣睇一套電影，通常對我嘅personal experience（個人經歷）嘅興趣會少啲。」
至於另一間標榜「全港首個線下網紅工作室」嘅公司仲開咗間cafe，提供地方同創作資源畀KOL，仲會設立「訓練學院」專攻KOL訓練課程。KOOLeader創辦人Kenny認為所有人都可以成為KOL，更睇好本地KOL市場發展，「因為連品牌商都未清楚點樣同KOL合作係最佳方法，所以我哋就設立呢個全開放式平台，希望品牌商好方便咁，喺我哋系統click幾個掣，就已經搵到相應嘅KOL。」線上係一個中介配對平台，線下係類似open office嘅資源分享平台。O to O（online to offline）線上線下包攬晒，好似好方便喎。佢仲話，客戶更可以將產品直接送到呢間cafe，KOL就直接嚟呢度攞產品試用，拍埋片、影埋相，就完成咗個job。咁方便，咪可以幫客戶快速生產like and share囉？
著名營銷人徐緣表示，當KOL搵到錢，自然會有專業機構為各類網紅提供支援，或者主動發掘有潛質嘅網紅。佢笑言：「國內仲誇張，喺座大廈，搵晒旗下網紅入去住。佢哋咩都唔使做，每日就係瞓覺、食嘢、做直播，仲有屙，禁室培慾咁。」
不過，知名傳媒兼廣告人畢明對坊間工作坊不以為然：「KOL唔可以有補習班、雞精班，就雞一班人出嚟。KOL三個字其實係警訊，實質上就係廉價鱔稿集團。真正嘅Opinion Leader係唔會寫鱔稿，亦唔可能寫鱔稿寫到變意見領袖。」《廣告狂人》臉書專頁版主Raymond就對呢類培訓課程有啲「搲頭」，皆因KOL涉獵層面可以好廣泛，「KOL培訓課程究竟係培訓啲咩？係一個主播、演員、定係口才訓練班？如果想培訓一個有opinion嘅人，倒不如去讀創意寫作班仲好。」Raymond認為KOL本來係行銷術語，「佢哋就係一間中介公司，用KOL呢個概念去做生意，以培訓KOL作為搵錢嘅方法。」睇嚟，大家對KOL嘅市場或者衍生市場嘅睇法好淡爭持，有人對後市好有信心，有淡友就怕玩爛市。
對於畢明嚟講，真正嘅KOL要質、量兼備，唔係臉書多幾個like就係，「我對美國一篇文章有好深刻印象，佢話其實Opinion Leader唔係淨係C to C（consumer to consumer）（消費者對消費者），應該係B to C（business to consumer）（企業對消費者），行業或者客戶都會聽你講嘢。任何方面嘅意見領袖都要得到受眾同所屬界別嘅尊重，即係respect呢件事。Respect係要賺返嚟，唔係like得多就會respect你。」佢認為想成為KOL就如成名一樣，係一個意外，「天時地利人和，同埋自己要不斷精進，要培養自己喺唔同方面嘅修養。」
有「香江第一才子」之稱嘅陶傑就覺得，香港係一個「即食」社會，咩都要快，但亦消失得好快，所以KOL將來可能會無咗，但係呢種玩法喺未來一段好長嘅日子會更加蓬勃。《廣告狂人》版主Raymond就相信，短期內KOL呢個名稱會出現得更頻繁，「繼續陰魂不散，出現喺大家面前。即使轉一轉，叫Influencer（影響者）都好，都係換湯不換藥。」最後佢更抵死地奉上忠告：「創作就自己嚟，咪畀錢中介！」
* * * * *
想重溫【KOL個L】相關動新聞：
【KOL個L】敢做唔敢認 KOL爆Likes先係King？
http://bit.ly/2o7flQF
【KOL個L】借刀殺人做愛情KOL 蘭桂坊身經百戰？
http://bit.ly/2oaMZF3
【薯片叔做邊類KOL好？】笑波子主L-Laughter 陶傑攻O-Opinion
http://bit.ly/2nJWRrO
【搲like有理？】IG女神廣告月賺過萬 KOL賣膠定食膠
http://bit.ly/2nwZbjq
* * * * *
場地提供：
THE WORK PROJECT（銅鑼灣金朝陽中心2期15樓）
Ginger（中環安和里12號地下）
記者：何宛珊(表妹)
攝影：馮峰、Neo、Teddy、Kaman
視像設計：希彤、余湘汶
後期：Roy
編審：阿仙
監製：Kaman