雖然電台DJ一直只係得把聲，好少見到個樣，但係都一樣受到唔少人所追捧，無他嘅，話晒DJ係靠把口搵食，識得講嘢梗係0氹得人歡心，有時搵錢能力分分鐘俾全職藝人賺得仲多，有啲仲泊到好碼頭，上岸唔使撈，但係同樣亦因為把口太得，令人有所誤會，因而搞出唔少緋聞兼是非。
前《新香蕉俱樂部》主持之一杜浚斌(Ben)，喺舊年8月爆出佢背老婆偷食拍擋陳貝怡，試過多次俾人影到佢拖住陳貝怡返女方嘅屋企短聚，甚至不避嫌拍拖行街shopping，嗰陣呢單緋聞有唔少同事都知道，只不過係冇人踢爆，事後阿Ben只係認同陳貝怡係好好嘅朋友，不過佢亦承認同老婆婚姻出現問題。
喺1990年入行嘅前商台DJ蘭茜(簡詠嫻)，當年因為一棚哨牙，加上佢又唔介意做醜角，所以幕前幕後都見到佢嘅踪影，之後因為同楊寶玲一齊做電台主持，形象即刻升呢大放改變。之後佢喺2006年淡出娛圈秘嫁做人妻，同富貴老公Johnny住喺樂活道寓所，得閒嗰陣搵嘢學吓打發時間，對水墨畫同古董都好有研究，但係之後有傳佢婚姻亮起紅燈。
同樣係DJ出身嘅林盛斌(Bob)，因為把口了得，結果由DJ轉型做演員兼主持同製作人，而且仲越搬越豪，最近仲同老婆去咗沖繩補行婚禮。之不過阿Bob亦試過俾人影到去買鹹碟兼揼邪骨，幸好事後獲老婆力撐，雖然阿Bob表明冇接受其他服務，但為避嫌以後唔會再去。