選舉事務處喺特首選舉後，被揭發遺失兩部手提電腦，內有1,200名特首選委及全香港300幾萬登記選民嘅個人資料，可謂震驚全港。好多網民對選舉事務處唔公開交代，淨係話會透過電郵及發信向選民道歉十分不滿，認為係卸膊表現，但有民主派人士話，其實呢件事或者都有積極一面，就係選舉事務處向全港選民發信，變相令選民有機會知道，自己地址有冇俾人盜用嚟種票。
呢個民主派人士話，雖然經過政黨及傳媒踢爆種票，理論上應該冇乜明目張膽嘅種票行為，但難保仍有漏網之魚，今次選舉事務處向所有登記選民發道歉信，如果有選民收到並非自己屋企人嘅道歉信，即係你個地址可能畀人用緊嚟種票，咁就要通知選舉事務處；如果有人收唔到道歉電郵同信，咁就要向選舉事務處check吓，你個選民登記係咪被人取消咗。