「別了依然相信，以後有緣再聚。」啱啱喺特首選舉中落敗嘅曾俊華，有一個錢買唔到嘅團隊，而胡官亦連日喺社交網站答謝佢嘅團隊。估唔到10年前選過特首嘅公民黨梁家傑，就有緣同番當年嘅團隊成員再見。
傑哥噚日分享當年選戰團隊成員黃明樂fb貼佢哋敍舊嘅相，仲話「2007年，我們為香港的核心價值和制度，及無錢、無權、無票的香港人打過一場漂亮的仗」，只係遺憾至今未能履行到當年對慈雲山張伯嘅承諾，畀番一票佢。但點都好，佢哋並冇忘記過特首選舉呢段無悔今生嘅旅程，嗰百幾日值得永遠回味。八方相信，只有真心嘅團隊先至可以唔單只喺選舉時團結，就算隔咗10年後都聚得番一齊。