同大家玩個IQ題，題目係咁：
嗱，我o依家就6歲，我個妹就係我一半嘅歲數。o依家我60歲，咁我個妹幾多歲呢？
你有3秒時間作答
1
2
3
正確答案係？
如果你答咗30歲囉，咁就真係恭喜你呀！因為你同阿Sa（蔡卓妍）個答案一樣呀！前日何超蓮喺instagram貼咗段片，佢問阿Sa以上呢條問題，天真嘅阿Sa就直接思考咗60/2=30，結果超蓮笑到踎喺哋，仲笑阿Sa好可愛。至於阿Sa呢，就一臉茫然咁坐喺到儍笑。
前日《蘋果》搵過阿Sa講番起呢條數學題，Sa話條問題好蠱惑：「個問題唔係完全係一個數學問題囉，佢都有少少……即係……呃人嘅成份嘅。佢初初話……如果我6歲，我個妹細我一半。好容易去到60歲就去咗30歲囉。」
阿Sa仲拎埋會考成績證明自己數學好差，佢話：「我會考數學攞F囉，我仲打俾我阿媽同佢講『嘩！我數學竟然有F呀！』，佢答我『F都好啲，起碼唔係U呀』全世界嘅人對我嘅數學都好冇信心。亦都從來冇期待過我數學好叻，所以我o依家將我所有嘅錢交晒俾我阿媽，我覺得係我最明智嘅選擇。」
為咗證明自己計數真係好差，阿Sa越揭越多數學考試歷史：「我啲數學真係好差㗎……自從小學3，4年班已經好差，根住就全部都冇合格過……哈哈哈哈哈……我真係完全唔識計數。」
解釋番，姊姊6歲時候，妹妹歲數係姊姊一半，即係細3歲，所以姊姊到咗60歲，妹妹都已經57歲喇！