55歲嘅台灣男演員馬景濤，前日突然宣佈同34歲太太吳佳尼結束十年婚姻，呢段係馬景濤嘅第二段婚姻，第一段婚姻係同唐韻，90年馬景濤同唐韻結婚，可惜婚姻只維持咗三年，佢哋育有一名女兒馬世嬡。
但原來馬景濤曾講過一生人最愛嘅三個女人，口中竟然係冇呢兩位太太吳佳尼同唐韻，而佢嘅最愛除咗媽媽同女兒馬天嬡，就係今年53歲嘅于莉。馬景濤喺95年同女友田麗分手後，就嚟香港拍攝亞視版嘅《包青天之俠骨神算》，認識到于莉，馬景濤一直都好欣賞于莉，覺得佢又靚又高貴，而馬景濤亦真係好愛于莉，為咗佢仲發誓會戒酒之餘，馬景濤當年仲為咗對手陳秀雯嘅一句說話，仲搞到要報警收場添！
是咁的，當年陳秀雯同馬景濤合作《天長地久》時，馬陳二人合演夫婦，拍攝其中一場結婚戲時，記者探班，咁就當然叫「一對新人」親下臉㗎啦，但當時「新郎哥」馬景濤就一口拒絕，咁陳秀雯就只講咗一句話：「佢怕女朋友呷醋啩！」第二日，正喺大陸拍戲嘅于莉，就俾同劇組嘅任達華取笑佢呷醋，馬景濤知道後就要陳秀雯公開道歉，而陳秀雯老公林國雄亦都替老婆出頭，話要馬景濤冇運行，就係咁馬景濤覺得自己受威脅，就去咗警署備案。(新聞連結： http://bit.ly/2ohoMAp )
無論你話有幾愛，馬景濤同于莉最後都係經唔起時間同距離嘅考驗，97年于莉提出分手，理由就係兩人聚少離多，大家缺少溝通喎！當時有傳馬景濤曾經為呢段情有過輕生念頭。
除咗馬景濤，于莉就係同台灣名嘴曾國城傳過姊弟戀，有指曾國城喺01年，曾經帶父母到香港同于莉見面，兩個人感情穩定，台灣傳媒仲講到佢哋會半年內會結婚，但不久于莉就發聲明話因為曾國城太花心決定和他協議分手。直到目前，53歲嘅于莉依然單身，未知佢情歸何處！