體壇拾趣：
班尼斯幫東方爆贏福建

銀牌賽負方組東方龍獅以81:72擊敗有周家駒射入全場最高28分嘅標準福建；尾場南青以86:77擊敗遊協，東方同南青會喺下周一負方組決賽對戰。
首節東方打出一段11:2攻勢，後衞陳兆榮單節獨取11分，幫東方首節領先32:21。第二節東方中鋒班尼斯以兩吓大力入樽掀起序幕；福建一直未能追近，東方半場領前46:31。換邊後，福建換入活力充沛嘅余耀明，幫福建連得七分；但攞到21分13籃板嘅班尼斯喺籃底玩晒，福建三節落後53:62。第四節福建控衞周家駒挺身而出，連入兩球三分後再偷波上籃得手，最後三分鐘福建一度追至69:70，但東方實力始終喺福建之上，終贏81:72。

與南青入負方決賽

場南青延續上場對南華嘅佳態，喺梁民熊領軍下，半場以58:36遙遙領先遊協。下半場遊協一度追近至75:70五分差距，但終未能收復失地輸77:86。