Uniqlo姊妹店GU，已經喺今日正式登陸香港。不過如果你認為，香港人到日本，會從此失去所有到GU朝聖嘅理由？咁又未必，因為有一種體驗，叫「神奇自助收銀機」，係日本GU有，而香港GU未有的。
日本GU早於2015年引入「自助收銀機」，話佢神奇，係有原因嘅。依家香港一般商店用嘅自助收銀機，都係要大家自己掃瞄條碼，逐樣逐樣產品掃，最慘係咩，成日掃瞄器成日都對唔中個Code。不過GU呢部機係，只要你將一堆衫掉入去個「收銀機」櫃入面，（係真係掉入去，你鍾意摺起放又得，成住菜掉入去都得），然後閂埋個櫃，一按，佢就半秒左右就自動識別到所有產品，然後你跟住屏幕指示畀錢，跟住走人，閃得！
其實GU都個產品，都喺價錢牌入面嵌入「無線IC標籤」。呢個標籤係採用RFID技術，英文全名Radio Frequency Identification，意思係利用電波（RF）（非接觸式）進行個體識別（ID）嘅「自動識別技術」。正正係RFID嘅普及化，令大家都可以喺日本GU，兩三分鐘內輕鬆畀錢。不過，如果閣下要退稅，就麻煩到另一個Counter搞手續。
不過，香港GU方面就話，香港暫時未會引入呢部「神奇自助收銀機」，所以要去畀自己一個理由行日本GU，都仲有嘅。