港台DJ貴花田驚傳婚變，及後當事人極力否認。呢位DJ媽媽已經年屆44歲，同老公華哥育有一對子女。貴花田自小有閱讀障礙，影響到佢學業成績，不過呢度失去咗嘅能力，就喺大仔度出現番，因為大仔智力高達144分，屬資優兒童。
貴花田形容自己係普通師奶，肉緊仔女嘅學業。貴花田曾經接受過傳媒訪問，話同老公一早有共識，英文係重點發展項目。連揀幼稚園、小學都有要求，希望仔女每日都接觸到外籍老師，聽多啲英文，最終如願喺呢兩個求學階段都入到英文名校。
為咗仔女發展全面啲，貴花田把握住小朋友6歲前嘅黃金期，喺仔女3歲開始已經安排上游水、日文、音樂同芭蕾舞堂。不過貴花田話只要求仔女上英文堂，其他都係按仔女興趣先報讀。
貴花田教育方針仲有一個準則，就係唔俾小朋友玩遊戲機，驚佢哋一玩上癮停唔到。咁有咩方式消遣呢？貴花田就決定買書俾仔女睇，一套七冊嘅《哈利波特》係囝囝至愛，阿仔仲叻過好多人，係睇英本版，非常犀利。