之前講過影壇女股神趙薇「偷雞唔到蝕渣米」，借錢高槓桿收購A股萬家文化輸緊3,000幾萬（人民幣．下同），但原來趙薇已經止蝕離場，根據萬家文化最新公告，趙薇畀完2.5億元首期之後就無再畀2.7億元尾數。
根據萬家文化最新披露嘅股權轉讓公告，趙薇旗下嘅龍薇傳媒原本同萬家文化控股股東萬好萬家集團喺2月13日簽訂《補充協議》，約定龍薇傳媒以5.2億元從萬好萬家手中買入萬家文化約5%的股權，並且萬家文化已收到首筆轉讓款2.5 億元。
協議寫明，交易雙方喺30個工作日內辦理完股權過戶手續，但如今30個工作日已經到期，都冇收到龍薇傳媒派人去配合辦理股權過戶手續，意味趙薇選擇止蝕離場。
趙薇舊年公佈，打算同銀行借30億入主萬家文化做大股東，但後來「幕後金主」肖建華被「挾走」後，隨即被閂水喉，拎唔到本身向肖建華旗下西藏銀必信資產管理借嘅15億，趙薇惟有將收購規模大縮水逾八成，由「入主」改為「入股」，以5.2億元買入3,200萬股。
肖建華出事前，萬家文化1月17日一度升到25元，如果「入主」規模冇變，當時女股神趙薇賬面賺超過15億，但好可惜，隨着肖建華出事，萬家文化股價隨即插水，由賺15億變到要倒蝕2.5億，今次趙薇睇嚟都手尾長啦。