現年44歲嘅孫耀威同36歲嘅女友陳美詩（Macy）結束八年愛情長跑，據知兩人將於今年拉埋天窗，下月到墨爾本、悉尼、珀斯等地影婚紗相。大前日喺內地拍戲嘅孫耀威，越洋送花慶祝拍拖八周年冧女友，還自誇「其實我都浪漫。」
「可能係Surprise」
原來孫耀威已決定賜「孫太」封號畀Macy，前日馮仁昭致電向準新娘恭喜，佢口密話：「吓！你收到呢個風，我都未收到喎。」問到係咪要保持秘密，婚後先公開？Macy堅稱：「唔係呀，我真係冇收到風。」問到男友求婚未？佢話：「可能佢想一次過畀surprise我都唔定，保持住神秘先。」
至於心目中嘅夢幻婚禮？Macy話：「我冇諗㗎，香港同外地都冇乜所謂。」係咪嫁硬孫耀威？Macy扮矜持：「睇吓啦，諗一諗先，都會朝呢個方向嘅。」心急做媽咪？佢話：「唔心急，一直隨遇而安，覺得自有安排。」孫耀威同樣守口如瓶，詐儍話：「呢啲風成日都咁收，Macy啱啱send message話我知啦，未定呀，有消息再話畀你知，多謝關心。」
撰文：馮仁昭
