志雲大師喺商台主持節目，不時請政界中人接受訪問，點評時事。之不過上過去佢節目嘅嘉賓都知道，其實大師最鍾意同大家傾衣着打扮。
「好過同佢講政治」
之前葉劉選特首時接受訪問，志雲大師就大讚對方上衣、手袋、皮鞋都襯到絕，𠱁到葉太直播途中抬高玉腿擺上枱show對靚鞋，令大家睇到眼都凸埋。噚日就輪到佢黨友田北辰上去，二少本業係搞時裝生意，平時打扮都好姿整，兩人一見面梗係雞啄唔斷咁傾，大師仲拎咗二少條袋巾襯自己套西裝㖭。二少就笑言：「我嘅袋巾簡直為佢而設，我諗同佢講fashion仲好過同佢講政治。」