介紹番兩個女足球員畀大家識，一個係清純可愛嘅「小美女」，另一個就係酒吧打人嘅火爆「野獸」。最近內地媒體報道，話中國女足出現一代新女神，就係廣東U18嘅熊熙，令到熊熙呢排微博嘅粉絲多咗10倍！而喺地球嘅另一邊，阿仙奴女足嘅珍瑪露絲喺酒吧同人爭風呷醋打人。
廣東美少女想學牛丸教波
講咗美少女熊熙先啦，佢喺月中嘅全運會女足18歲以下組預賽C組比賽入面，補時入波，幫廣東U18女足贏咗山東U18女足。內地傳媒同網民發現，原來17歲嘅熊熙幾靚女，熱爆微博。《新浪體育》喺官方微博度讚熊熙外表清秀，被球迷稱為中國女足新一代嘅女神，呢個post吸到超過4,000個like！有網民睇完熊熙啲相，都不禁感嘆：「明明可以靠臉吃飯，卻選擇了踢球。」
熊熙當然即刻被網絡起底啦！佢嘅個人微博由一個月前得千幾個粉絲，到家陣已經暴漲到超過17,000個！熊熙話：「真係有受寵若驚嘅感覺，粉絲由千幾升到萬幾，真係唔適應。」佢仲話好多人喺度留言，嚇到佢唔敢上去微博。熊熙話父母都好支持佢踢波，反而佢自己怕曬黑。雖然熊熙細細粒，但佢話自己踢法靈活，唔會驚高大嘅球員，偶像係尼馬，希望嚟緊可以一路讀書，一路踢波喎。問到第日想做乜，佢話想跟「牛丸」陳婉婷條路，「我諗以後都係做番呢方面嘅嘢，離唔開足球。」熊熙被叫做新一代女神，而國足家陣嘅女神相信就係踢門將嘅趙麗娜。
女「兵」為同性女友打交
喺英國都有單關於女足嘅新聞，阿仙奴女足後衞珍瑪露絲因為打人而惹官非。同《美女與野獸》套戲有啲似，呢單嘢都有同性戀元素，唔知一陣會唔會有家長嚟投訴我求大俠嘞。有晚25歲嘅珍瑪露絲同女友莉亞鍾斯去酒吧飲嘢，莉亞鍾斯都係球員嚟，踢緊米禾爾。另一位米禾爾女足球員施度洛就走去撩隊友莉亞鍾斯，搞到珍瑪露絲好躁，加埋醉意，露絲就同施度洛打起上嚟。因為呢單同性三角戀，入過英格蘭國家隊嘅珍瑪露絲家陣被告，惹上官非。