我求大俠發現阿仙奴開始取代曼聯嘅地位，講緊係吹水轉會轉聞呢方面。一直以嚟，英國各大傳媒日日都幫曼聯買人賣人，但最近似乎厭倦咗曼聯，淨係日日做阿仙奴，不斷講雲格、奧斯爾同阿歷斯山齊士嘅去留。近日，英媒引述南美傳媒話，山神暗示去車路士！
奧斯爾暗示想返德國
報道講，當記者問到山神嘅前途，佢話：「我想長期留喺呢個城市，效力一支有勝利者氣質嘅球隊。我28歲箒，仲有大把世界。」要喺倫敦同埋有冠軍氣質嘅球隊，肯定唔係話阿仙奴啦，仲唔係家陣英超榜首車路士！不過，英國《衞報》同《獨立報》就即刻走出嚟澄清，話因為繙譯問題，唔少英語傳媒都誤解咗山神嘅意思，其實山神想話倫敦係好地方，想完成同阿仙奴嘅合約，並冇透露離隊嘅意思喎。此外，奧斯爾話屋企人想佢返德國，「如果我返德國踢波的話，我好多屋企人，尤其阿媽都會好歡迎。」山神疑似上「車」，但前車路士、韋斯咸前鋒卡頓高爾就加盟印尼嘅萬隆，簽約10個月，嚟緊會同艾辛做隊友。
