現年44歲嘅孫耀威喺1992年參加喺台灣舉行嘅青春之星國際音樂大賽後，獲得優異獎，其後簽約加入娛樂圈。孫耀威本身係高材生，自小成績優異，唔知係咪因為咁，為佢加咗好多分，入行近25年，佢嘅緋聞女友雖不至於要列張清單嚟計，不過都唔叫少，圈內圈外?都有。好在呢隻雀仔飛呀飛，終於都肯修心養性，定落嚟娶陳美詩。
鄭家榆
孫耀威喺00年因拍攝台劇《懷玉公主》，有傳兩人戲假情真，惟孫耀威一直對外斷然否然戀情，翌年年初，孫耀威單方面向傳媒表示兩人分手，有報道指鄭家榆因為幾乎患上抑鬱症。後來孫耀威到台灣宣傳專輯時，重提呢段舊情，佢形容為噩夢，佢亦因此背上「負心漢」之名。
應采兒
05年，孫耀威回流返港拍攝亞視劇集《美麗傳說2之星願》，被指同拍檔應采兒傳緋聞，不過，呢段「兒孫戀」最後不歡而散，應采兒話列咗孫耀威喺黑名單，孫耀威亦拒絕祝福舊愛，有指兩人拍拖1年半。
楊秀惠
喺07年，當年34歲嘅孫耀威被揭戀上楊秀惠，甚至有報道指男方包養女方，兩人曾合演《Click入黃金屋》，女方又擔任過音樂電影《分手公司》女主角。曾經喺傳媒面前friend到可以搭膊頭影相，但後來孫耀威指呢單緋聞係炒作，仲指被炒作到over咗。到09年，有傳楊秀惠因打botox打到歪面，孫耀威笑對方可能貪平出事。