下月9日沙田有兩項國際二級賽上演，分別為1200米短途錦標及1600米主席錦標。
上述兩場大賽，毛里裘斯籍騎師田泰安都獲大摩力撐，將夥拍前馬王「威爾頓」角逐主席錦標，短途錦標就會騎新勝嘅「飛來猛」。其中「威爾頓」曾由田泰安贏過兩次，人馬合拍，今仗隨時交出好成績。
除咗「威爾頓」之外，大摩喺主席錦標仲有打吡冠軍「佳龍駒」、應屆馬王「明月千里」同董事盃「喜蓮獎星」列陣，由於唔係國際一級賽，按例唔容許申請騎師訪港客串，即係話大摩兩大愛將布文同貝湯美，無緣為上述馬匹執韁，令大摩為騎師人選傷透腦筋。
不過，目前正值停賽嘅祈普敦透露，自己好大機會夥拍「明月千里」出戰，當然一切要待大摩作最後決定。祈普敦1月底騎過「明月千里」，當時隻馬久休復出跑董事盃，只屬熱身性質，結果只得第6，之後「明月千里」狀態大幅提升，即換老拍檔布文奪香港金盃。
敦敦話上周曾策「明月千里」試閘，直指馬兒狀態續進，正值黃金期，縮程跑番1600米一樣夠晒霸氣，好希望能再替此駒出擊。