【紐約專訪】周麗淇 (Niki) 4年前憑中港合拍劇成功打開內地市場，更一度找到愛情，北上發展，最新更夥拍一線花旦孫儷拍劇飾演好姊妹，忙得連留港時間也不多。她早前抽空去紐約睇騷及受訪，談談長駐內地的苦與樂，漸漸融入內地的陌生環境與文化，全靠調整內心，放手迎接所有新事物；對於感情事，她也抱放鬆態度，不被37歲輕熟年齡羈絆，還是那句老土的說法：「可遇不可求。」
撰文：林嘉慈
攝影：周樂恒
化妝：Navi Lam
髮型：Debby Kwan of HAIR
周麗淇近年主攻內地電視市場，連內地小生舊愛徐正曦也是透過拍劇結緣。現年37歲的Niki單身一年多，盡可能不觸碰情感問題，「又唔可以講放棄搵，但我覺得唔好諗，你一提我又好似覺得係，但有啲嘢可遇不可求，我已經唔記得咗呢件事，去追求一啲我冇辦法去控制到嘅嘢。」唯一能控制的，就是把工作做好，「我刻意又刻意唔到，變咗我希望好正面咁去等待，但又唔係真係坐喺度等，邊做嘢、生活，遇到就遇到。」
接受未婚生仔
生活充實、信念強，Niki不受已生了兩個囝囝、家庭幸福的家姐周汶錡影響，而急於結婚生仔，笑說可愛姨甥Jacques早已屬於自己，「基本上每日都同佢視頻，返香港每日都見到佢，都係自己屋企人，冇乜所謂，佢確實好得人喜歡。」她續說：「我生個又未必同家姐嗰個一樣，首先唔會係mix，唔會因為人哋啲小朋友得意而自己想生，真係唔同嘅嘢嚟，等我自己ready咗先，一步步嚟。」補充一句，她不排斥未婚產子，「生咗BB先結婚都幾好。」未知她會否帶來驚喜呢？
冇情人有好處
Niki今年的中西情人節都在美國度過，身邊是同於賭場開騷的任賢齊、工作人員，以及撞正同時出席紐約時裝周的好友蔡卓妍，不愁寂寞，沒有情人也有好處，「唔使煩，一陣間要expect佢送啲乜，唔送啲乜又嬲。」
即使長期在內地開工，Niki也有同事關懷。新劇《那年花開月正圓》劇組在開機前已用群組互通消息、過節互送紅包，營造融洽氣氛，合作前令她感到既興奮又緊張的對手孫儷，也打成一片，「開工嗰時覺得佢好親切，一啲架子都冇，冇令你覺得好難溝通。佢係好精靈，我唔expect佢體能方面咁好，記得有場戲要同佢跑，嘩！佢好快！」
適應內地環境
讀普通話對白是港星拍內地劇的難題，Niki一直靠勤力惡補，這次付出更大努力，「節奏要快，又要做戲，對我嚟講有啲吃力。劇組好好，有個台詞老師教我哋節奏、語氣同發音。」
一直以來，Niki覺得最難的反而是適應問題，「啱啱入內地拍戲時未適應，個環境好陌生，因為唔係我用慣、食開嘅嘢，開頭有一段時間係諗：『唉，咁點算呢？』當你放開咗呢啲所謂嘅諗法，或者平時嘅習慣，其實好容易融入，例如食嘅嘢，我𠵱家都幾鍾意食辣，以前唔得㗎！」心態決定一切，「做乜都好，要心境開朗，真係好緊要，個人開心，基本上做乜都順利啲，食乜都開心啲。」
煲湯高手
Niki長駐內地的保養方法是針對體質、因應氣候，堅持每日煲湯，「之前去山西拍嗰時真係流鼻血，當時嗰度係煤礦，我從來未去過。後尾劇組叫我買放濕機，日日飲雪梨水、海底椰、雪耳滋潤吓，同埋煲吓甜嘢令自己開心啲。」在內地未必常買到瘦肉，Niki就用無花果代替，「最簡單係蘋果、雪梨、雪耳、南北杏就搞掂，基本上當水飲就得。」去到任何地方都盡可能保持基本生活習慣，「早餐都係食嗰幾樣嘢，飲多啲水。」
更多精采時尚內容，盡在 http://add.appledaily.com 。