候任特首林鄭月娥競選時講明新班子要注入新血，可以預料現任班子嘅司局長，都會換得七七八八，其中一個唔會留低嘅相信係律政司司長袁國強（圖）。
八方聽聞，佢將強勢回歸之前執業嘅Temple Chambers，有知情人士話喎，聽聞佢連辦公室都睇好晒位㖭呀，擺明去意已決。
其實袁國強跳出熱廚房，據聞係因為意興闌珊，單係早前立法會議員宣誓風波，袁國強一再強調香港司法系統可以處理到，點知中央大石砸死蟹，堅持人大釋法，對佢嚟講點會好受？
而未來嘅律政司司長，面對嘅壓力肯定更大，除咗人大有可能再因其他事務釋法，最殺到埋身兼棘手嘅相信係高鐵嘅一地兩檢方案。
據聞香港同內地，至今就內地人員嘅執法問題有分歧，律政司司長點睇都好關鍵。
講開Temple Chambers，確係猛人如雲，大律師公會前主席都有幾個，包括石永泰、湯家驊等，而前律政司司長黃仁龍都係呢間律師事務所嘅成員，袁國強早喺1995年就獲前律政司唐明治及湯家驊邀請加入。