日前趁假期，帶住小女兒睇真人版《美女與野獸》，本身對女主角冇咩特別好感，始終唔係《哈利波特》迷，而且91年套動畫版都真係好經典，無論故事、畫功、配樂以及主題曲都好正，迪迪尼今次兵行險着拍真人版，都真係幾冒險，好彩拍出嚟都唔差，增加男、女主角嘅背景，令佢哋相戀更加合理。唔少宗教人士批評呢套戲有同性戀成份，恕我直言，如果呢套都唔啱一家大細睇，真係冇一套合家戲電影嘞。
重拍1991年作品都可以好出色，阿仙奴（圖）領隊雲格由1996年執教至今，就顯得越嚟越新瓶舊酒。近五場聯賽輸四場，不敵車仔、紅軍都情有可原，對西布朗都輸1:3，阿仙奴名宿麥臣賽後就話，阿仙奴𠵱家就係爭咁啲火。
阿仙奴𠵱家踢緊英超，都算係世界球壇最體力化同實力最平均嘅聯賽，中下游球隊心知名氣唔夠，搶分就要靠積極拼搶，呢幾場阿仙奴球員就好似公務員咁，不慍不火，他他條條等完場。
講真，作為阿仙奴球迷，換唔換雲格都真係冇咩感覺，就好似香港選突手咁，唔通好似小弟呢啲小人物有份投票咩，777定888都控制唔到，阿仙奴高層都係睇住盤數。而且做得阿仙奴球迷，都係預咗冇咩冠軍，如果想爭冠軍，一早好似前學民成員咁幫777站台，改捧咗車路士曼聯曼城多年啦。𠵱家睇阿仙奴比賽好簡單，只要賽後唔心痛就算，雲格呀雲格，可唔可以畀啲火我呀。文：牽牛