隔牆有耳：
維尼全球首展紙筆草圖 - 李八方

小熊維尼殺到！時代廣場今起舉辦「小熊維尼︰友你友我」展覽，展出92件華特迪士尼檔案館珍藏，有50幾件展品仲係全球首展，包括1966年嘅人手繪製動畫草圖，當時動畫師先用藍色蠟筆喺紙上勾勒，每張紙都有編號，代表移動次序，現時動畫轉晒用電腦繪圖，呢種傳統畫圖法已經成為歷史。

展覽仲展出《小熊維尼之蜂蜜樹》原始創作圖，當時為減省時間，動畫師會製作固定背景，再將人物動態用顏料墨水畫喺透明膠板上，故事透過人物的變化展現，唔使改變背景。另外，展出嘅一套六隻、喺1964年出售嘅小熊維尼公仔，因為年代久遠已絕版，當時為咗引起熱潮，電影公司特登喺電影上畫前兩年就推出公仔，行銷策略好成功！展覽舉行至4月23日，會場同時放有19個3D模型公仔，畀fans同角色selfie。