有咩人得咗獎都愁眉苦面呢？就係已經投身咗商界嘅前平機會主席周一嶽，噚日係大愛同盟成立4周年籌款晚會，大會向York Chow頒咗Biglove Hero大獎畀佢，表揚佢在任期間致力推動平權，佢話最遺憾當年冇強硬推動反歧視條例，令到政府冇將呢樣嘢放做priority。
對於新任特首林鄭月娥，York話林鄭本身係天主教徒，但係講過話唔會因為信仰而影響佢制訂公共政策，希望佢講得出做得到。
大愛晚會星光熠熠，除咗眾星之外，仲有吳靄儀做主禮嘉賓，佢講明要求立法會議員勤力啲，推動反歧視同埋同性婚姻法。不嬲好支持同志嘅葉劉淑儀就同八方講到好勞氣，話𠵱家政府對於性小眾平權所做嘅係非常之落後，佢早排為咗爭取香港主辦同志運動會，但政府最後完全唔騷佢，激到佢好鬼嬲。
關公王利民奪最佳衣着
噚晚大會主題係「英雄好看」，參加者要以心目中嘅英雄形象出現，向來玩得嘅康宏集團主席王利民關公上身，搞到八方都完全唔認得，成功奪得最佳衣着獎。法政匯思游月華Donna又嚟料，話原本想扮神奇女俠，可惜最終買唔到套衫，惟有再次低胸大露背出場，震撼全場。
盛裝出席嘅公民黨余若薇，捐出《忘記他是她》墨寶，結果成為王利民（Quincy）同陳淑莊之爭，由萬二蚊搶到兩萬六蚊，結果全身see through嘅Tanya除咗造型不敵關公，就連心頭好都俾Quincy搶走。至於「與楊岳橋瘋狂食飯」嘅機會，底價一萬蚊，由卓韻芝同導演關錦鵬兩個爭，最後由卓韻芝用兩萬蚊投得。大愛噚晚目標籌100萬，其中一個project係搞Biglove TV，未來希望每年製作一套local同志微電影，軟銷平權概念。睇噚晚拍賣盛況，應該唔難達標。
李八方