跑馬就係咁神奇！第五場至講緊「同進」連續兩次排最內1檔都贏，第六場三班1000米，卻由最外12檔馬「旅遊多寶」勝出，鞍上人見習騎師巫顯東在練馬師苗禮德支持下，打開個人歷來谷草勝門，捧走怡和挑戰盃，亦是巫顯東首次在港捧盃，單Win及組合獨贏A3分別派88.5及30元。
聘請佘詩曼任代言人的雅芳婷老闆許章榮，其名下南非自購馬「旅遊多寶」之前兩捷，均由巫顯東師姐蔣嘉琦於谷草1000米取得。今次初配巫顯東，克服12檔落力搶放，末段猶有餘勁贏1.25馬位重響勝鼓，馬匹本身取得季內首捷。
大贏家是落飛黨，閘前重注「旅遊多寶」獨贏及位置得手，兩瓣都着啡燈開跑，估計他們從WP彩池中可獲利約1,400萬，贏到開巷。
巫顯東首勝盃賽，他表示非常感謝師傅沈集成的教導，以及今場苗禮德給予機會，非常開心自己第二次在快活谷上陣即取得勝利，他謂會繼續努力，希望多取頭馬。
第六場前四名冷熱互見，當中第二名由雷神騎大熱門「威風霸皇」取得，三、四名分別為「手到拿來」及「祥勝駿駒」，四重彩派一萬七千幾。三T正獎有人中，每注派245萬幾。