眾所周知，第1檔於谷草有黃金檔位之稱。這晚（29日）谷戰以全場最窄的C加3跑道作賽，1檔馬上半場完全贏唔到，最叻只有第三場「勝在煌」由雷神跑第二。
當大家對1檔馬起疑問之際，方嘉柏同何澤堯俾番信心大家，兩師徒於第五場攜手為「同進」連捷於谷草四班1200米，此駒一連兩場同程排1檔起步贏馬，今場前置守好位下，彈甩贏2.5馬位，表現出一種大熟超班味道，相信幕後會繼續埋首谷草搵食。而今場單Win及組合獨贏A1分別派28及16元。
方嘉柏近排做番谷草王，連同今仗他近七場頭馬中，有四場由徒弟何澤堯勝出，師徒復現合作威力。較特別是呂健威馬房上仗由何澤堯建功的新勝馬「一支梅」，今場換上梁家俊搏輸跑尾二，但家俊仔太太阿Kit李潔瑩，仍有為「同進」拉頭馬，仲笑得好開心。
第五場有三駒「金」行字頭，結果俾一隻「同進」殺晒，二至四名順序為「金飯碗」、「金叻星」及「金磚五國」，四重彩派四萬二千幾。