【KOL個L】「薯片叔叔」曾俊華喺特首選舉落選後去向未明，噚晚po咗最後一輯「你問我答」，話有人問佢會唔會轉做網上KOL。假如「薯片叔叔」做KOL，應該向邊方面發展呢？今集《KOL個L》介紹兩類嘅KOL，話唔定可以參考喎！
笑波子，全職YouTuber，YouTube頻道近50萬人訂閱。陶傑，有「香江第一才子」之稱，facebook亦有超過20萬個like。二人看似風馬牛不相及，但就被唔少人冠以同一個稱號－KOL。
波子喺大學畢業後隨即成為全職YouTuber，今年已經係第四年。對於佢嚟講「L」for Laughter(笑聲)係最重要，因為佢話：「我拍片就係為咗引大家笑。」為效果，佢有時要做古怪事情，甚至被誤會精神有問題：「一開頭面對haters嘅人身攻擊，會唔開心好耐，有少少接受唔到，我拍片咁有心血，整完條片你都要鬧我。」不過佢已經學識點樣面對，一早已經「免疫」：「令觀眾開心，我會好有成功感。」問到佢點睇自己，佢就話：「我覺得自己係一個帶住正面嘅KOL。努力啦，好勤力嘅人。」波子每日至少會上傳一至兩條短片上YouTube，日日都不停度橋、拍片、自己做埋剪接，難怪佢覺得大台有宣傳片對KOL嘅形容唔多準確：「只係形容咗KOL好風光，好自由自在嘅一面，覺得好似係唔使付出就已經得到收穫。」有人或者會批評佢拍嘅短片冇營養，波子就覺得：「我係全程想去搞笑多於教育，如果大家想睇功能上嘅片，點解唔睇書？」
至於陶傑就主攻「O」for Opinion(意見)：「我自己經營facebook，唔會成日話我今日去邊到食嘢，嗰碟餸好靚，影張相同大家分享，我唔做呢啲嘢。你身為一個KOL係要有腦，要識得edit，即你要係一個總編輯，亦都係一個節目總監。」識得運用唔同社交媒體並唔係易事：「呢個平台係集電視、電台、雜誌、報紙於一身，你呢個網主亦都要集多種專業同觸覺於一身。」對於「KOL」三個字，才子有另一個解讀：「我會話KOL係『King of Likes』，like你嘅人越多同埋越係支持你，你先係King。」
兩位網路紅人路線唔同，可能係因為目標觀眾有異，不過至少佢哋有一個諗法係相同，波子話：「Key Opinion Leader，即係一啲擁有思想、可以影響到人嘅一班人。要有自己嘅特色，如果唔係你只不過係一個C (Copy)and P (Paste)。」一如陶傑所講：「全世界每一日有咁多人唱K，但係始終只係得一個George Michael、一個Lady Gaga。」佢亦認為KOL唔可以隨波逐流：「不能人云亦云，你要有自己嘅知識同觀點，有獨立思考。」睇嚟想喺社交媒體世界贏like都唔係易事。才子預計：「KOL個名稱可能將來無咗，但呢種玩法、同呢種與世界溝通嘅方式，喺未來一段好長嘅日子會更蓬勃。」
唔好錯過【KOL個L】相關動新聞：
【KOL個L】敢做唔敢認 KOL爆Likes先係King？
http://bit.ly/2o7flQF
【KOL個L】借刀殺人做愛情KOL 蘭桂坊身經百戰？
http://bit.ly/2oaMZF3
記者：何宛珊(表妹)
攝影：馮峰
視像設計：希彤、余湘汶
後期：Roy
編審：阿仙
監製：Kaman