𡃁模郭穎兒（Celia K.）本月初為老公李冠鋒誕下囡囡李明芯（Galia），日前安排攝影師為囡囡影BB寫真，Celia昨日在電話中說：「影相當日，我哋好緊張，我同老公幫囡囡揀造型頭飾，老公買咗兩支大燈話每月都要親手同囡囡影寫真，好偏心。」
另一媽模趙哲妤（Uny）前晚在家為囡囡搞百日宴，Uny昨表示已幫囡囡改名趙真羽（Natalie），乳名小魚，筱靖和「陳七」陳肇麒另一半劉雅婷（Toby）等閨蜜到賀，但卻未見小魚爸爸。問Uny可對囡囡生父心淡？她昨以短訊回應：「冇，我要做最堅毅嘅媽媽，冇所謂，前世因，今生果，惟有今生再做好啲。」
採訪：陳杰