等放長假等到頸長，終於到悠長嘅復活節假期，好多人plan緊外遊透透氣。費清呢啲窮L，點窮都要搭飛機窮遊，想慳錢咪揀廉航，食少個飛機餐。新加坡航空PR Stephanie爆料話，如果費清外遊咁啱係生日、度蜜月，或者係結婚周年紀念，就一定要搭新航，空姐會免費送一個半磅或1磅蛋糕俾你喺萬呎高空慶祝。
吓！咁着數，費清之前都無聽過。Stephanie話，新航一直都有呢個貼心服務，但無乜人知；乘客只要出發前48小時打電話去新航訂位部預訂就得，完全免費，全機人同你另一半慶祝，好窩心㗎。費清上網睇國泰、香港航空官網，訂個蛋糕盛惠$300同$260。
Stephanie又話，飛機餐都有唔少選擇，唔係只得食肉食素兩種，而係五大類：
‧宗教：印度教非素食餐、猶太認證餐、猶太認證素食、Muslim餐；
‧齋餐：印度齋餐、生菜素食餐、耆那教素食餐、東方素食餐、嚴格素食餐、蛋奶素食餐；
‧嬰兒、小朋友餐: 幼兒餐、斷奶後嬰兒餐、適合嬰兒之兒童餐；
‧健康餐：清淡餐、生果餐、低卡路里餐、無脂肪餐、適合糖尿病患之餐膳、無麩質餐、低乳糖餐、低鹽餐、非嚴格無堅果餐；
‧其他餐：海鮮餐、無牛肉餐、無海鮮餐
Stephanie話，機票已包埋飛機餐，客人只需在網上或旅行社購買機票嗰陣就可以揀餐，唔會收任何手續費，又唔會因為點特別餐而額外收費，但必須在出發前48小時預訂。
費清最後多口問一句，咁邊個餐最抵食？Stephanie爽快話，成本最貴係海鮮餐。
費清
＃要生計，也要生活＃毋忘初衷