早前一個大型特首選舉論壇，有市民問三位候選人支唔支持香港興建多用途賽車場，呢個議題新民黨田北辰一直好關注，早前發展事務委員會傾研究欣澳發展，佢要求政府研究新式大型旅遊項目包括賽車場，其後約見香港單車隊總教練沈金康同長跑運動員了解情況，之後發現叫「多用途道路活動場地」比「賽車場」更合適。前日發展事務委員會再傾欣澳發展，田二少提出動議力促研究時盡可能為日後發展唔同嘅消閒及娛樂設施，包括多用途道路活動場地等預留彈性，竟然獲通過。過咗呢關，二少會再約見相關持份者，收集更多意見。