林鄭月娥搵緊人埋班，各界對人選意見紛紜，有位官員卻獲跨黨派議員歡心，攜手all in撐唔好被out，佢就係有「儍強」之稱嘅財經事務及庫務局局長陳家強（圖）。2007年曾蔭權搵佢做局長，作為政界新丁嘅佢被議會中人話烏吓烏吓，封佢做儍強。至2012年梁振英上任搵佢冧莊，儍強突然變咗超班馬，被指喺當時雜牌軍中表現出眾。
到咗林鄭當選，有傳女特首有心儀財經局話事人選，儍強徘徊出局邊緣，卻獲黨派攜手支持。會計界議員、專業議政梁繼昌話儍強呢幾年做得好好，笑指佢代表嘅會計界同所屬嘅專業議政，相信會all in撐陳留任，仲話稍後要WhatsApp林鄭直接推薦。自由黨主席張宇人都話儍強喺今屆問責團隊中廖化作先鋒，表現唔錯，若林鄭問佢意見，佢會支持儍強再坐一屆。
據聞北京對儍強都信任，事關財金官員對作為國際金融中心嘅香港嚟講極為重要，但除咗林鄭肯唔肯，亦要睇當事人制唔制……如果冇晒啱嘴形嘅團隊，留低或者比離開更困難喎。