查實呢，葡萄呢樣嘢，真係唔係女士先至啱。睇吓特首梁振英，接連追擊民主派上屆選戰冇支持佢呢位當時民望較高嘅候選人，就知啲葡萄湧到上CY心口。
噚日CY出席行會前評論周日結束嘅特首選戰，例牌讚吓林鄭以777票勝出，係「高票當選」，又指外國任何有競爭嘅選舉中，獲超過五成票數並非易事。表面似乎讚林鄭好巴閉，但實質疑似借勢插民主派，包括挺曾俊華而令林鄭反而緊箍建制選票。
CY話喎，今次嘅特首選舉係民主化嘅其中一站，無限loop政改方案被否決，令市民唔可以一人一票選特首，明顯將矛頭指向泛民，之前呻過民主派上屆冇all in佢嘅CY，繼續話關注攞到成300幾票嘅民主派，竟然冇協調一位代表參選，明顯錯失機會，明言泛民今屆嘅舉動，令人百思不得其解，「咁樣係咪等於曾俊華就係佢哋嘅代表？呢個係令大家深思」，嗰陣夾雜怨恨嘅酸味濃到呢……