日本排球聯賽近期備受注目，除咗因為「排球女神」木村紗織宣佈退役，連男子組一樣有好戲睇！喺周日上演嘅日本男排聯賽全明星賽，效力太陽鳥隊嘅24歲二傳手山本湧（Yu Yamamoto）同豐田合成29歲主攻手高松卓矢（Takuya Takamatsu）各為其主，山本喺第一局一次「虛攻」fake晒高松，忍唔住過網挑釁吓，高松唔知真嬲定假嬲還以顏色，雙方推撞完一輪，球迷們諗住食花生睇吓之後搞邊科，點知呢個時候雙方竟然一kiss泯恩仇，當然引來全場「腐女」球迷尖叫！連山本湧賽後喺ig都話睇番片段，忍唔住笑咗！
與韻律操靚女準備結婚
不過，如果咁就當佢哋係hehe，就未免太膚淺嘞，因為喺比賽場上同性互咀，不時都有發生，最經典嘅就係喺1996年小保加贏咗自由盃之後，兩大阿根廷球員馬勒當拿同簡尼基亞擁吻嘅場面。而且，山本湧嘅另一半喺日本體壇亦好出名，佢就係22歲嘅韻律操靚女畠山愛理，兩人更不時會上雜誌晒恩愛，仲話已經到咗談婚論嫁嘅地步㖭！
