林鄭月娥勝選特首後，積極搵人埋班。外界曾經有傳，資深大律師兼民主思路召集人湯家驊係下屆律政司司長人選，但近日傳出嘅林鄭班底疑似人選，湯狀榜上冇名噃！湯狀噚日喺港台節目自爆，特首選舉初期確實有候選人邀請佢入閣，但唔係林鄭，而佢當時都婉拒咗對方好意。
佢話入政府從來都唔係佢嘅考慮。咁如果下屆政府真係提出邀請呢？佢話係假設性問題，任何人可以為香港前途出力都應該考慮嘅。但呢句先係重點，雖則佢對做官冇興趣，但話「世事無絕對」。
湯狀又話，民主思路希望推動民主同落實一國兩制，但唔係中間路線，而係溫和民主路線，指中肯同中立有分別。咁呢條路線接近薯片定係林鄭多啲？佢冇正面回應，但話若以處事風格嚟睇，「林鄭唔會差得過曾俊華」，至少每次見面，佢都會提出個人睇法，話民主派其實都流傳一個笑話，「（話）見曾俊華，可以擺個紙牌喺度」，點解？因為佢通常唔講嘢。